Газета "Моздокский вестник", г. Моздок

(Нæ хистæр хæстон фæлтæрæн)
Нæ бауагътат æфхæрын
Уæ райгуырæн зæхх,
Знагæн ныккодтат
Бæрзæйсæттæн цæф!
Уæ хъæбатырдзинад
Хъуыстгонд уыд дæрдтыл,
Фыссæг уыл куы фыссы
Йæ чингуыты ныр.
Тыхджын уыд уæ намыс,
Уыд кадджын уæ ном,
Уе `гъдау æмæ фарнæн
Нæ уыди кæрон!
Куыд уæздан уæ кафт уыд,
Куыд рæсугъд – уæ зард!
Зæрдæйы хызтысты,
Нæ сын уыд æмбал!
Уæ зонындзинæдтæ
Нæ кодтат æвгъау,
Кæддæриддæр домдтат
Æфсарм æмæ `гъдау.
Нæ уагътат рæдийын
Кæстæрты сымах.
Куыд бирæ сæ уарзтат!
Куыд сын кодтат аргъ!
Уæ сыгъдæг удты куывд
Хуыцаумæ дæр хъуыст,
Фæдзæхстат кæстæрты:
«Дæ хорзæх сæ уæд!».
«Уæлахизæй – амонд,
Фыдбылызæй – хызт!
Нæ дуне сабыр уæд!» -
Уæ куывды сæр уыд.
Дунейы фарнæй
Ныр хайджын куы стæм,
Æмæ уын арфæ
Мах абон кæнæм!
Уæ кад æмæ намыс
Нæ уыдзысты сæфт,
Фæлтæрæй фæлтæрмæ
Цæудзысты лæвæрд.
Кæд искуы уæддæр ныл
Уæ зæрдæ фæхудт -
Зæрдиагæй курæм:
Ныххатыр кæнут!