- Дианæ, дæ бинонты тыххæй ма нын ра-дзур, дæ хорзæхæй.
- Мæ мад æмæ мæ фыд, мæ хо æмæ ме `фсымæр цæрынц Джызæлы. Нæ фыдæлтæ уыдысты кусаг, æгъдауджын. Мæ фыдымад Сасинкъа (рухсаг уæд, мæгуыр) схаста фараст сывæллоны (иу дæр дзы йæ бинонтæй нæ рахицæн!), уыд диссаджы нана махæн. Бирæ йæ уарзтам. Йæ фыруæзданæй комкоммæ ныхас никуы скодта, дзырдта фæсномыгæй, æмбисæндтæ æмæ таурæгъты фæрцы йæ кæстæрты зонд кусын кодта. Ныр мæхæдæг ирон æвзаг бæстондæр куы сахуыр кодтон, уæд æй бамбæрстон, цы хæзнатæ мын ныууагъта, уый! Чи ма ахуыр кæны ныр хатиагау дзурын æмæ æмбарыныл?
- Куыд дæ рауагътой дæ бинонтæ Мæздæгмæ?
- Мæ фæндыл æргомæй сразы сты, сæхины-мæры та æнхъæл уыдысты: «Иу мæйы фæстæ ралидздзæн!». Мæхи зæрдæ дæр бамæгуыр фыццаг, æмдзæрæн куы федтон, уæд. Фæлæ фыццæгæм скъолайы рæзты куы фæцæйцыдтæн, уæд мæ бафæндыд æрмæст уым кусын. Адæмимæ хæстæгдæр куы базонгæ дæн, уæд мæ цыма цыдæр хæлттæ ацы зæххимæ бабастой, афтæ мæм фæкаст.
- Мæздæджы агъоммæ кæм куыстай?
- Университеты райдиан кълæсты ахуыргæныны методикæйы факультеты ирон æвзаджы кафедрæйы куыстон ахуырады дæсныйæ. Иуахæмы мæм æрбацыдысты ме `мбал чыз-джытæ Кокойты Ангелинæ æмæ Токты Индирæ æмæ мын радзырдтой, Мæздæгмæ цæуын кæй сфæнд кодтой, уый тыххæй.
- Ныр дæ фæндыл нæ фæсмон кæныс?
- Нæма! Фæлæ мæ æппынæдзух фæнды ног зонындзинæдтæ исын. Царды аздахæнты хъуамæ бирæ цыдæртæ зонай. Æрæджы фæсаууонмæ райстон дыккаг уæлдæр ахуырад: каст фæдæн Мæскуыйы бюджет æмæ къазнадоны академи, ноджыдæр ма мæм ахуыримæ баст фæндтæ ис. Скъолайы та мын бабар кодтой диссаджы цымыдисаг предмет – ирон традицион культурæйы уроктæ. Ам, Мæздæджы, ирон æвзаг дæр, æгъдæуттæ дæр хибар методикæ домынц, кусæм бирæнацион кълæстимæ, куыдхуыздæрæй сын ирон культурæ уарзын кæнæм. Ноджы ма мын ме `вджид бакодтой, аудын кæуыл хъæуы, ахæм 12 сабийы. Цы бинонты æхсæн цæрынц, уыдонмæ хъуамæ мæ цæст дарон. Зын хæс у, фæлæ дзы тыхсгæ нæ кæнын…
- Конкурсмæ дæ ныфс куыд бахастай?
- Мæ фæсонæрхæджы дæр нæ уыд, фæлæ мæ арвыстой районы ахуырады фæткдаруатæй. Зын мын нæ уыд: æрæджы, аттестацийы рæстæджы, бирæ бацархайдтон, мæ чысыл фæлтæрддзинадæн хатдзæгтæ скодтон, урок радтон Дзæуджыхъæуы 27-æм скъолайы цыппæрæм къласы, мæ хъуыдытæ ахуыргæ-нæджы дæсныйады тыххæй радзырдтон. Мæхæдæг дзы архайдтон конкурсы, уый мæм диссаг нæ каст, фæлæ республикæйы хуыздæр ахуыргæнджыты куыстмæ кæй бакастæн, семæ кæй базонгæ дæн, уый мын у тынг æхсызгон.
Дианæ у суинаг ахуыргæнæг. Фæлæ дзы ныридæгæн кæй æппæлын, уымæн дæр ис æфсон. Аттестацийы балæвæрдта фыццаг категоримæ, фæлæ йын къамис, хатдзæгтæм гæсгæ, снысан кодта уæлдæр категори. Ног ахуырадон технологитæй парахатæй, ис зæгъæн – æнцон æмæ æхсызгонæй - пайда кæны. Ис æм хорз адæймаджы, æцæг ирон чызджы миниуджытæ: у уæздан æмæ хæдæфсарм, сæрæн æмæ бæстон. Уымæн æй бауарзтой сабитæ, æууæндынц ыл ныййарджытæ æмæ æмкусджытæ.
- Дианæ, Мæздæджы дæ зæрдæмæ цы цæуы?
- Сывæллæттæ! Ноджы ма бузныг стæм, ирæттæ ныл æнувыд кæй сты; æхсызгон нын у, ирон фæсивæд кæрæдзийы кæй æмбарынц, уый. Культурон цард дзы хорз æвæрд у, адæм фæлмæн цæстæнгасæй кæсынц…
- Бузныг, Дианæ! Дæ хуыздæр хъуыдытæ сæххæст уæнт, хорз амонд дæ хай!